வாத்துக்காரன் கதை

நாங்கள் கூட்டாய் வாழ்ந்தோம்
வாத்தொன்று மைதாஸை
போல் எங்களிடமும் இருந்தது
ஓற்றை ஓற்றையாய்
தங்க முட்டை
நிதமும் உண்டு
தீனியும் நிறைய
செலவும் ஆனது

எவன் தீனி கொடுப்பது
எவனுக்கு தங்க முட்டையென
சச்சரவும் வந்தது
வாத்தின் இருப்பை நிராகரிக்க
சிலர் முடிவு செய்தனர்
வாத்தின் தீனியை நிராகரிக்க
சிலர் முடிவு செய்தனர்
முட்டையை மட்டும்
எவனும் நிராகரிக்கவில்லை
அது மட்டும்
அடிப்படை உரிமையாம்

வாத்தென்னெவோ எதையும்
கவனிக்காமல் முட்டை கொடுத்தது
தீனிக்கேற்றது போல் சிறிதும்
பெரிதுமாய் முட்டை தினமுண்டு

அறிவு தனக்கு அதிகம்
வளர்ந்தாய் அதிகம்
சொல்லிக் கொண்டிருந்தவன்
அறுத்து விட முடிவெடுத்தான்
மொத்தமாய் எடுத்து
ஒற்றை நாளில் பங்கு
பிரிக்க ஏற்பாடும் செய்கிறான்

மைதாஸூக்கு பெயர் பேராசைக்காரன்
இவனுக்கு பெயர் அறிவுசீவியாம்

// வளர்ந்து வரும் தாய்பூமியை தொடர்ந்து குறை கூறி, இதன் குறைகளை நிறைகளாக்க மாற்ற என்ன செய்ய வேண்டுமென எண்ணாமல், நாட்டை உடைக்க சொல்லி பேசி அறிவுஜீவியாக மாற நினைபோரை நினைத்து எழுதியது//