குறை

மருந்து வாடையடிக்கும் நீரருந்தி
ஏதேதோ வியாதி வாங்கி
என் வீட்டு பிள்ளைகள்
தனக்கும் சாக்கடைக்கும்
பிரிவினை பேசாமல் எங்கள் தெரு
வேலை செய்ய ஆசையுண்டு
களத்து வேலையோ கட்டட வேலையோ
கூலி கிடைத்தால் வயிறு நிறையும்

விளங்கினப் பயல்கள் ரண்டு பேர்
பஞ்சம் தீர்ப்பதாய் வந்தார்கள்
ஒருவன்
பாரம்பரிய பூமியிது
நாமெல்லாம் சகோதரர்கள்
வந்தே மாதரம் சொல்லு
வண்ண வண்ண மிட்டாயுண்டு
மனம் நிறையும் மயிர் சிலிர்க்குமென்றான்
மற்றொருவன்
கசங்காத வேட்டி சட்டையோடு
ஏழைப் பங்காளன் தானேன சொல்லி
மொழி பேசி இனம் பேசி
திரைப்படங்கள் சில அலசி
சாக்கடையோடு தெரு முடியுமிடத்தில்
கட்சிக் கொடியேற்றி
வாழ்கவென வாழ்கவென கூவு
மனம் நிறையும் மயிர் சிலிர்க்குமென்றான்

எங்களுக்கு மயிர் சிலிர்க்காதது
மட்டுந்தான் இவன்களுக்கு
குறையாய் தெரிகிறதாக்கும்